இன்று 13 மையங்களில் இந்தியன் வங்கி கடன் முகாம் நடக்கிறது

கடன் முகாம்

இந்தியன் வங்கியின் கும்பகோணம் மண்டல மேலாளர் பி.வீரராகவன் வெளியிட்டுள்ள அறிக்கையில் கூறியிருப்பதாவது-

இந்தியன் வங்கி தஞ்சாவூர் ஜங்சன், ஒரத்தநாடு, திருவையாறு, பாபநாசம், கும்பகோணம் மெயின், திருவாரூர், திருத்துறைப்பூண்டி, பட்டுக்கோட்டை, மயிலாடுதுறை, மன்னார்குடி, வேதாரண்யம், நாகப்பட்டினம், தென்பாதி(சீர்காழி) ஆகிய 13 கிளைகளை மையங்களாக கொண்டு 85 கிளைகளை சேர்ந்த வாடிக்கையாளர்களுக்கு சிறப்பு கடன் முகாம் இன்று(சனிக்கிழமை) காலை 10 மணி முதல் மாலை 5 மணி வரை நடக்கிறது. முகாமில் வீடு, வாகன மற்றும் சொத்து அடமான கடன்கள் வழங்கப்படுகிறது. மேலும் வீட்டு மனை வாங்குவதற்கும், புதிய வீடு கட்டுவதற்கும், வீடு வாங்குவதற்கும், பழுதுபார்ப்பதற்கும், வேறு நிதி நிறுவனங்களில் உள்ள வீட்டு வசதி கடனை மாற்றி கொள்ளவும் கடன் வழங்கப்படுகிறது.

ஆவணங்கள்

கடன்பெற விரும்பும் வாடிக்கையாளர்கள் அடையாள அட்டை மற்றும் முகவரி சான்று, சம்பளப் பட்டியல் அல்லது கடந்த 3 ஆண்டுகளுக்கு வருமானவரி செலுத்திய படிவம், வீடு பற்றிய ஆவணங்களின் நகல்கள், வங்கி பாஸ் புத்தகம் ஆகியவற்றை கொண்டு வர வேண்டும். ரூ.75 லட்சம் வரை வாங்கும் கடனுக்கு மிக குறைந்த வட்டி விகிதமாக 9.65 சதவீதம் நிர்ணயிக்கப்பட்டுள்ளது. 

வீட்டுக்கடனை மாற்ற விரும்பும் வாடிக்கையாளர்கள் சம்பள பட்டியல் அல்லது கடந்த 3 ஆண்டுகளுக்கு வருமான வரி செலுத்திய படிவம், பிற நிறுவனத்தில் வழங்கிய அனுமதி கடிதம், கடந்த 2 ஆண்டுகளின் மேற்கூறிய கடன் கணக்கின் விவரம் ஆகிய ஆவணங்கள் கொண்டு வர வேண்டும்.

மேலும் விவரங்கள் தேவைப்படுவோர் கும்பகோணம் மண்டல அலுவலக கடன் பிரிவு மற்றும் அருகிலுள்ள இந்தியன் வங்கி கிளைகளை அணுகி தெரிந்து கொள்ளலாம். 

இவ்வாறு அந்த அறிக்கையில் கூறப்பட்டுள்ளது.